Nag-inom sa control point

CEBU, Philippines — Gimando ni Cebu City Police Office Director Police Colonel Josefino Ligan ang paghimo og imbestigasyon kabahin sa viral photo bahin sa mga barangay tanod nga nagbantay sa Barangay Quarantine Control Point sa Barangay Tisa nga giingong nag-inom. Si Ligan mimando kang Chief of Police sa Police Station 10 Police Captain Jonathan Dela Cerna  paghimo og imbestigasyon bahin niini.

Buot ni Ligan nga mahibaw-an kun kinsa ang mga nag-duty niadtong higayona ug kun unsay silot ang mapahamtang kun pananglitan mapatud-an nga nag-inom gyud sila samtang nagbantay.

Mipahibalo si Ligan nga kun mapamatud-ang nag-inom ang maong mga tanod buot niya nga matangtang sila sa serbisyo.

“Ang pag-inom naa nay Executive Order ana pero kung naa ka sa Barangay Control Point mag-man ka og control point, naa ka sa area nag-provide ka og security it’s a very big no-no nga ikaw pa man nuoy magpasiugda diha, mag-inom ka diha sa control point so pa-imbestigahan ta na, kinsa tong mga involve mao lagi if proven nga sila gyud, nag-inom gyud we will not hesitate to recommend nga matangtang sa ilahang trabaho pud,” sigon ni Ligan.

Sa post sa Tisa Daily Bulletin niadtong Oktubre 12, 2010 gipahibawo nila nga gipakigtagboan ni Tisa Barangay Captain ang tanang tanod sa barangay.

“Makasalig kamo nga aduna’y lakang nga pagahimoon ang Barangay kabahin niini,” tipik sa post labot sa maong hitabo. /IBM (BANATNEWS)