San Nicolas Proper maapektohan sa BRT

CEBU, Philippines — Gibutyag ni Kapitan Clifford Niñal sa Barangay San Nicolas Proper, Dakbayan sa Sugbo nga gisugdan na ang public consultation sa iyang konstituwente uban ang Department of Transportation (DOTr) alang sa taud-taod na nga plano nga Cebu Bus Rapid Transit System sa Metro Cebu. Matud ni Niñal nga pipila ka lugar sa iyang barangay ang maapektohan kon pormal na nga mapatuman ang BRT ilabi na sa mahitabo nga road widening.

Si Niñal kinsa sakop usab sa board sa Cebu Integrated Transport Service Multi-purpose Cooperative (CITRASCO) nipadayag sa iyang pag-uyon sa proyekto apan nanghinaot kini nga mahatagan og alternatibong pamaagi nga dili kini makahatag og dakong apekto ngadto sa mga drayber sa PUJ.

Subay niini, nanghinaot si Niñal nga makabiyahe na og balik ang mga tradisyonal nga PUJ gumikan kay taas-taas na usab ang pag-antos sa mga drayber ilabi na kadtong adunay gibuhi nga pamilya.

Ug ang pipila ka operator dako usab kini og nagasto sa pagkuha og prangkisa hinungdan nga nasubo kini nga wala pa tugoting makabalik og biyahe ang mga tradisyonal nga PUJ. Matud usab ni Niñal nga kong tugotan nga makabiyahe og balik ang mga PUJ andam silang motuman sa mga health protocol sama sa istriktong pagpatuman sa social distancing.

Ang mga PUJ nahunong kini sa pagbiyahe dihang gipaubos sa community quarantine ang dakbayan. Ug ang mga bus maoy kasamtangan nga gipabiyahe karon.

Sa niaging semana, ang kagamhanan sa Dakbayan sa Sugbo nag-umol og task force aron tabangan  ang mga drayber sa tradisyonal nga PUJ nga makabalik sa pagpamasada. /BDB (BANATNEWS)