Mga sakop sa CT-TODA gipangtusokan og flu vaccine

CEBU, Philippines — Gipangtusokan og flu vaccine ang mga sakop sa City of Talisay-Traffic Operation Development Authority (CT-TODA) sa niaging adlaw.

Kini aron mas mapalig-on pa ang resistensya sa mga enforcer kinsa kanunayng magsagubang sa init ug uwan diha sa kadalanan.

Si Jonathan Tumulak, pangulo sa CT-TODA sa siyudad nagkanayo nga silang tanan gipangtusokan og flu vaccine.

Gikatahon nga sa niaging buwan adunay duha ka sakop sa CT-TODA nga nagpositibo sa COVID-19 ug pulos na kini naka-recover.

Sa pagkakaron, padayon ang ilang pagsunod sa health protocols bisan og paubos na sa modified general community quarantine (MGCQ) ang siyudad. – Gabriel C. Bonjoc/BDB

CSBT nangandam sa pagbukas pagbalik

Nangandam na ang Cebu South Bus Terminal sa pagbalik sa operasyon niini sa may N. Bacalso Avenue, Siyudad sa Sugbo.

Matud ni Carmen Quijano, manager sa CSBT, nga gikan sa 1,500 nga kapasidad sa terminal, anaa ra sa 500 ang ilang dawaton inig balik sa ilang operasyon aron masunod ang physical distancing sa mga pasahero.

Ipatuman sab gihapon sa CSBT ang “no ticket, no entry” ug bisan kadtong dili magsul-ob og face mask ug face shield dili usab pasudlon.  “Mao na ang problema kay mo-limit ra man mi og mga pasahero sa sulod didto sa passenger’s lounge abot didto sa luyo sa terminal. So ang uban adto ra sa gawas. So akong giawhag ang mga tawo magdala mo og payong,” matud ni Quijano.

Ang mga tulda nga gibutang sulod sa terminal sa atubangan nga bahin ipabilin ra hinoon kini aron adunay kapasilongan ang mga pasahero.

Si Quijano nagkanayon nga naghulat na lang siya karon og kamanduan sa gobernador kun kanus-a ibalik ang operasyon sa CSBT.

Sa pagkakaron, kasamtangang anaa sa luna sa Lantaw Restaurant gibutang ang terminal tungod sa pagpatuman sa community quarantine.

Samtang ang mga public utility vehicles nga gihatagan og special permits magpadayon hangtud sa Septiyembre 6, 2020. Matud sa director sa Land Transportation Franchising and Regulatory Board 7, Eduardo Montealto Jr., nga ang lugway nga gihatag subay sa proklamasyon ni Presidente Rodrigo Duterte sa pagbutang sa ubang bahin sa nasud ubos sa modified general community quarantine lakip ang Central Visayas.

Gitug-an ni Montealto nga tanang modernized public utility jeepneys modagan sa ilang rota subay sa certificate of public convenience uban sa special permits.  Rowena D. Capistrano/GMR (BANATNEWS)