CEBU, Philippines — Ang Department of Education-Cebu City division mipahibalo nga aduna silay 156,621 total enrollees sa mga public schools alang sa umaabot nga school-year 2020-2021.
Kini gibase gikan sa uwahing pag-ihap sa DepEd Tayo-Cebu City Division. Wala pa hinuon mabahig kun pila niini ang sa elementarya o high school senior ug juniors sanglit nagpadayon pa gihapon ang enrollment.
Positibo hinuon gihapon ang maong gidaghanon ilabi na panahon karon sa kalisdanan para sa mga magtutudlo ug sa mga tinun-an nga karon pa sab makasuway og distance learning.
Sa miaging tuig, nakatala ang siyudad og 180 mil nga total enrollees pagsugod sa klase sumala pa sa DepEd-VII regional office.
Karong gisibog ang klase sa Oktubre 5 inay unta ugmang adlawa, gipaabot nga madugangan pa ang mga nagpa-enroll.
Ang DepEd modawat gihapon og mga late enrollees basta 80 porsiyento sa mga adlaw nga dunay klase matambongan sa estudyante sa usa ka tuig.
Ang DepEd-Cebu City Division mipadayag na sa ilang kaandam sa pagbukas sa klase. Sa unang quarter sa tuig, mogamit ang DepEd-Cebu City Tayo og “self-learning” modules.
Ang mga tinun-an sa Cebu City mogamit og tulo ka learning modalities—printed modular learning, offline modular distance learning ug online modular distance learning.
Nasuta sa survey nga kadaghanan sa tinun-an sa public schools gipili ang printed modular learning kay di tanan dunay gadgets alang sa offline o online learning.
Dako og papel ang mga ginikanan sa pagtudlo sa ilang mga anak niining bag-ong pamaagi sa edukasyon sa mga bata ilabi na kadtong naa sa grade schools gikan sa grade 3 paubos.
Si Cebu City Mayor Edgardo Labella mipadayag sa iyang dakong pagsalig sa mga magtutudlo nga makat-on ang mga bata.
“The future of the country depends on the young people.Let us always be reminded that the future belongs to our young Cebuanos,” matud sa mayor.The Freeman/IBM (BANATNEWS)