Siyam ka barangay sa Mandaue gi-disinfect

CEBU, Philippines — Gipahigayon sa mga sakop sa City Disaster Risk Reduction and Management Office sa Dakbayan sa Mandaue ang disinfection ug contact tracing sa mga barangay nga nagtala og mga bag-ong kaso sa coronavirus disease 2019.

Naglakip sa mga barangay mao ang Canduman, Casili, Tabok, Pagsabungan, Jagobiao, Subangdaku, Tipolo, Cambaro ug Opao.

Hinuon sa post sa Public Information Office (PIO) sa dakbayan maoy natala ang padayon nga pagsaka sa gidaghanon sa mga naka-rekober nga pasyente sa COVID-19 nga niabot na sa 1,617 ug gilauman nga mosaka pa kini sa mosunod nga mga adlaw.

Nunot sa padayon nga pagsaka sa kinatibuk-ang gidaghanon sa mga recovery nga pasyente sa COVID-19, maoy natala usab ang nagpadayon nga pagkunhod sa gidaghanon sa aktibong kaso nga anaa na lang sa 336.

Samtang nagpabilin lang gihapon nga 82 ang namatay nga pasyente sa COVID-19 sukad niadtong Marso hangtud karong buwana sa dakbayan.

Padayon nga gihingusgan sa kagamhanan ang pagpatuman sa mga health protocol alang sa paglikay sa maong virus nga naglakip sa pagsul-ob og face mask, face shield, social distancing ug kanunayon gyud ang pagpanghunaw og tubig gamit ang sabon o alcohol. /GMR (BANATNEWS)