CEBU, Philippines — Mibalik na sa kaulohan ang mga sakop sa Special Action Force gahapon human ang kapin usa ka buwan nga augmentation sa Dakbayan sa Sugbo.
Personal nga mitambong sa sendoff ceremony si Task Force Cebu City Overseer Secretary Roy Cimatu, Cebu City Mayor Edgardo Labella, IATF Cebu Implementer Retired Major General Mel Feliciano ug PRO7 Director Police Brigadier General Albert Ferro.
Si Ferro mapasalamaton sa SAF sa ilang kontribusyon sa dakbayan sa kapin usa ka buwan nilang pagbantay nga nakatampo og dako sa pagpatuman sa health protocols sa katawhan nga niresulta sab sa pagkubos sa gidaghanon sa mga kaso sa COVID-19 dinhi.
Hunyo 27 nangabot ang tropa sa Sugbo sa dihang gibalik ang siyudad sa enhanced community quarantine tungod sa subling pagsaka sa mga kaso.
Ang PNP-SAF gipabalik na ngadto sa kaulohan aron motabang didto tungod kay sila na sab ang gibalik sa higpit nga quarantine protocols tungod sa pagsaka og balik sa mga kaso ilabi na sa National Capital Region.
Ang mabiyaang pwesto sa SAF pulihan sa mga sakop sa Crisis Response Battalion (CRB) pinangulohan ni Police Lieutenant Colonel Ryan Devaras aron mopadayon sa higpit nga pagpasunod sa protocols.
“Special Action Force you have done a great deal in helping and making Cebu City downgrade from the MECQ, ECQ to GCQ, Cebu City and its people will never forget the contribution that you have extended to Cebu City exposing your lives being frontliners in order for us to conquer this invisible enemy, Cebu City will be eternally grateful,” pamahayag pa ni Labella kanila.
Way natakdan
Si Police Major Rene Joy Mosquiza, Battalion Commander sa SAF mipaambit sa ilang gihimong proteksyon nga sud sa kapin usa ka buwan walay bisan usa sa iyang mga sakop ang natakboyan.
Matud niya hugot ang ilang pag-obserbar sa minimum health standards kini sama sa pagsuot og facemask, social distancing ug ehersiyo.
Si Cimatu miingon nga dako gyud og natabang ang SAF nga mapaubos ang kaso sa Cebu City.
Matud niya kining mga gihimong lakang sa Cebu City gusto nilang mao sab ang gamiton sa ubang lugar nga nagproblema karon sa subling pagsaka sa kaso sa COVID-19.
Karon nga wala nay SAF, si Labella subling mihangyo sa katawhan nga pabilin nga mosunod sa health protocols ug dili mokompiyansa sanglit anaa pa gihapon sa palibot ang COVID-19. -Decemay P. Padilla/IBM (BANATNEWS)