Kapolisan uyon sa pag-abli sa kadalanan

CEBU, Philippines — Suportado sa Police Regional Office 7 ang pagtangtang sa barrier sa mga gipangsirado nga kadalanan sa Dakbayan sa Sugbo.

Matud ni PRO-7 director, Police Brigadier General Albert Ferro, nga pabor siya sa lakang sa Cebu City Transportation Office sa pagtangtang sa mga barrier sa kadalanan aron nga makatabang sa pagpaluag sa trapiko.

Dul-an sa upat ka buwan nga gipangsirad-an ang pipila ka kadalanan tungod sa pagkontrol sa mga sakyanan ug mga tawo nga mosulod sa Dakbayan sa Sugbo lakip sa mga Authorized Persons Outside Residence (APOR).

Usa niini ang one-way policy sa North Reclamation Area alang sa gikan sa Dakbayan sa Mandaue ug sa South Road Properties sa gikan sa Dakbayan sa Talisay.

Hinuon gipasabot ni Ferro nga magpabilin gihapon ang mga border checkpoints ug quarantine control point sa 15 ka lugar sa Dakbayan sa Sugbo aron sa pagkontrolar sa mga mosulod sa dakbayan ug pagseguro nga pulos lang mga trabahante ug dili ang pagsuroy-suroy ang tumong.

Magpadayon gihapon ang mga regular checkpoints sa kapolisan sa kadalanan isip kabahin sa regular police operational duty.

Ang pagpaubos sa general community quarantine sa Dakbayan sa Sugbo dili kini pasabot nga makalaroy-laroy na ang publiko kun dili sa pagpabalik sa ekonomiya human sa pipila ka buwan nga pagsirado tungod sa pagsaka sa kaso sa COVID-19.

Gitinguha sa Inter-Agency Task Force (IATF) nga moubos pa gyud ngadto sa community quarantine ang status sa tibuok Central Visayas aron sab nga mabalik na sa normal ang tanan ilabi na gyud kung aduna nay vaccine. /GMR (BANATNEWS)