CEBU, Philippines — Nidonar og ambulansiya ang Consulate General of the People’s Republic of China sa Cebu ngadto sa Department of Health - Central Visayas pinaagi sa Office of the Presidential Assistant for the Visayas (OPAV). Si Chinese Consul General Jia Li ang personal nga nitugyan niini ngadto kang Presidential Assistant, Secretary Michael Lloyd Dino DOH-7 Regional Director Jaime Bernadas ug ubang representante niadtong Biyernes.
Ang Chinese Consulate gikatakda usab nga modonar og emergency rescue vehicle ngadto sa kagamhanan sa Lalawigan sa Sugbo. Ang Consulate una na nga nidonar og rescue vehicle ngadto sa Lungsod sa Oslob sa Lalawigan sa Sugbo ug sa kagamhanan sa Probinsiya sa Bohol.
Nakadonar na sab ang Consulate og 7,292 ka sakong bugas humay balor og P3.5 milyones ngadto sa OPAV ug sa kagamhanan sa Siyudad ug Lalawigan sa Sugbo. Matud sa OPAV sa ilang pamahayag nga timaan kini sa mapadayonon nga panaghigalaay tali sa China ug Pilipinas kinsa bag-ohay lang nagsaulog sa ika-45 ka tuig nga diplomatic relations.
Gitumbok usab ni Jia nga naninguha ang duha ka gobiyerno sa pagsagang sa epekto sa coronavirus pandemic ngadto sa mga tawo. Ang duha ka nasud nagtinabangay sa pagpalambo ug pagbinayloay sa natad sa pamatigayon, negosyo, turismo ug kultura. (BANATNEWS)