CEBU, Philippines — Kapulisan sa Central Visayas, nagplano sa pagpangita ug mas dako ug lapad nga lock-up cells nga kasudlan sa mga tawo nga madakpan nga nakalapas sa health protocols nga gipatuman aron malikayan ang pagkatap sa COVID-19.
Kini maoy agig pagsanong sa kamanduan ni Presidente Rodrigo Duterte nga mas estrikto nga ipatuman ang mga health protocols ug dakpon gyud ang mga violators.
Ang pangulo sa Police Regional Office -7 Brigadier General Albert Ignatius Ferro, miingon nga ilang tumanon ang direktiba sa presidente apan kinahanglan mohimo sila ug adjustments. Lakip na niini ang pagpangita og mas daku nga lugar nga maoy butangan sa mga malapason aron masiguro nga dili mosamot og mokatap na hinoon ang coronavirus disease.
Dugang pa ni Ferro, dili paigo ang mga detention cells sa mga Police Station tungod kay kinahanglan nilang i-mintinar ang mga health standards sama sa social distancing sulod sa prisohan. /MEL (BANATNEWS)