DOH-7 nipasidaan; mga bugas gidonar ni Gatchalian

CEBU, Philippines — Ang Department of Health (DOH)-7 subling nipasidaan batok niadtong nagplano sa pagbaligya og plasma taliwala sa covid-19 pandemic.

Ang DOH-7 niluwat sa maong subling pasidaan gumikan sa report apan wala pa kini mapiho nga giingong adunay mga tawo nga tuyong magpatakboy sa covid-19 aron ibaligya ang ilang plasma sa mahal nga kantidad sa higayong maka-recover kini.

Gibutyag ni Dr. Mary Jean Loreche, tigpamaba sa DOH-7 nga ang balaod mosilot niadtong mga tawo nga mobaligya sa ilang plasma ngadto sa mga pasyete nga mataptan sa covid-19.

Sa laing bahin,  gikatakda ugma ang pagpasiugda og “Blood Donation Drive” sa kagamhanan  sa Dakbayan sa Lapu-Lapu isip pagtubag sa panginahanglan sa dugo ug plasma.

Si Mayor Junard Ahong Chan kinsa usa sa mga covid-19 survivor ang mangulo sa maong kalihokan ug nipadayag kini sa pag-donar sa iyang plasma.

Si Chan nihangyo sa uban pa nga mga covid-19 survivor sa dakbayan nga mosalmot sa maong blood donation.

Ang kalihokan magsugod kini sa alas 9:00 sa buntag hangtud sa alas 3:00 sa hapon ug ang mosalmot niini giawhag usab sa pagsul-ob og face mask.

Samtang nikabat sa 600 ka sakong bugas nga tag 50 kilos; 20,000 ka assorted canned goods; 50,000 packs nga noodles ug 100,000 disposable surgical masks ang gi-donate ni Senador Win Gatchalian ug pamilya niini ngadto sa Cebu City Government diin ang tanan nibalor sa kapin P2 milyones.

Gipahigayon kagahapon sa buntag ang turnover ceremony diin sila si Cebu City Mayor Edgardo Labella ug Kasambagan Barangay Captain ug Association of Barangay Council President Franklyn Ong ang nitambong. Romeo T. Limpangog, Decemay P. Padilla/BDB (BANATNEWS)