Midyear bonus sa senior citizens ug PWDs sa Lapu-Lapu gihatag na

CEBU, Philippines — Ang mga senior citizen nga Oponganon ang nihangop  sa sayo nga pagpanghatag  sa lokal nga  kagamhanan  sa dakbayan  sa ilang midyear bonus.

Ang 27,600  ka senior citizen  nga Oponganon ang makadawat sa ilang P4,000 nga midyear bonus ug ang 5,500 usab ka person with disability (PWD)  ang makadawat usab sa ilang P3,000  nga midyear bonus alang sa tuig 2020.

Si Mayor Junard Ahong Chan nagkanayon nga ang mga sakop sa pamilya sa senior citizen ang gitugotan sa pagkobra sa nahisgutang ayuda apan kinahanglang aduna silay ipakitang authorization gikan sa senior citizen.

Ang siyudad ubos pa karon sa general community quarantine diin ang mga senior citizen dili pa tugotan nga makagawas.

Giklaro ni Chan nga kadtong mga senior citizen nga nag-inusara sa ilang pagpuyo ug walay masugo nga sakop sa pamilya ihatud sa kagamhanan sa siyudad sa balay sa maong senior citizen ang hinabang niini.

Ang pagpanghatag sa midyear bonus gisugdan niadtong Mayo 19 o sa nilabayng adlaw nga Martes ug matapos usab sa adlaw nga Biyernes o Mayo 22, 2020. /BDB (BANATNEWS)