CEBU, Philippines — Gidayeg ug gipahalipayan ni Cebu City Mayor Edgardo Labella ang kapolisan sa Pardo Police Station nga gipangulohan ni Police Major John Kareen Escober.
Kini human sa pagkasikop sa duha ka tawo ug pagkasakmit sa sobra sa P28 milyones nga balor sa drugas. Matud ni Labella nga bisan sa hugot nga pagbantay sa kapolisan may kalabutan sa COVID-19 ubos sa Enhanced Community Quarantine nakahimo pa sila sa pagsikop sa mga nalambigit sa ilegal nga drugas.
Ang mayor nidasig sa kapolisan sa pagsikop pa sa mga nipahimulos sa dagan sa panahon ilabi na kadtong nalambigit sa ilegal nga drugas.
Kagahapon, tulo na sab ang nasikop sa buy-bust operation sa Drug Enforcement Unit sa Pardo Police Station alas 3:20 sa hapon sa St. Jude, Bulacao, Dakbayan sa Sugbo.
Ang mga dinakpan mao sila si Jeferson Rollorata Sampang, 22; Reynold Gaballo, 20, ug Charlou Gonzales Gutang, 22-anyos.
Atol sa operation nakuha sa mga dinakpan ang nagkadaiyang putos sa gidudahang shabu nga motimbang og 85 gramos nga mobalor og P578,000.
Ang mga dinakpan anaa gibalhug sa Pardo Police Station. Romeo D. Marantal/GMR (BANATNEWS)