Matag pamilya sa Talisay hatagan og tag 25KG bugas

CEBU, Philippines — Ang Dakbayan sa Talisay migahin og P30 milyones alang sa kaugalingon niining amelioration program alang sa mga wala makadawat gikan sa Department of Social Welfare and Development’s (DSWD) social amelioration program(SAP).

Apan sa programa ni Gullas, matag pamilya, bisan unsa pay kabutang makadawat tanan sa sunod buwan.

Sa pagsugod palang sa enhanced community quarantine (ECQ), ang Talisay City government nakahatag na og relief goods ug prayoridad ang mga kabus hangtud sa kataposan ning bulana.

Gibanabana nga 245,000 na ka relief packs nga naglangkob sa bugas, sardinas, noodles ug uban pa ang nahatag na sa siyudad.

Apan tungod sa extension sa ECQ,  si Mayor Gerald Anthony “Samsam” Gullas mipahibalo nga manghatag ang siyudad apil na kadtong mga nagpuyo sa mga subdivision og tag 25-kilos nga sakong bugas.

“This May, the city will purchase 80,000 sacks of rice at 25 kgs. This will be distributed to all households in the city, including subdivisions,” matud ni Gullas.

Sugdan kini paghatud sa unang semana sa Mayo diha sa mga barangay ug ang barangay personnel na maoy maghatud niini kada balay. 

Matud pa nga gihimo nila kini human nga daghan sa Talisay City ang wala maapil sa nahatagan sa hinabang sa DSWD.

“Strict sad kaayo ilang (DSWD) guidelines, for example kani, if mo-sobra ug 10,000 pesos imong income, dili ka makadawat sa SAP. So daghan ni complain,” matud ni Gullas sa iyang official Facebook page.

Gawas sa bugas, hatagan sab ang matag pamilya og tag P1,000 ilabi na kadtong mga wala kadawat og hinabang gikan sa DSWD, katong ubos pa sa P20 mil ang sweldo matag bulan, ug kadtong mga “no work, no pay”nga mga trabahante.

Kinahanglan lang ang duna silay barangay certification bahin sa ilang employment status ug balidong ID./IBM (BANATNEWS)