Mga lutsanan paingon sa Talisay higpit nga gibantayan

CEBU, Philippines — Ang mga agianan o lutsanan paingon sa Dakbayan sa Talisay ang lakip nga gipahugtan og bantay karon.

Kini sa pagtuo nga adunay molusot diha sa mga nahisgutang agianan samtang ang kapolisan nagmando sa exit ug entrance sa border diha sa South Road Property (SRP).

Sayo pa, si Mayor Gerald Anthony “Samsam” Gullas Jr. ug Kapitan Kirk Repollo sa Barangay Inayawan nagkasabot sa ilang ipatuman nga pag-estrikto sa mga tawo nga makalusot sa border.

Ang barikada o border checkpoint gihimo diha sa karsada padulong sa Inayawan samtang aduna usab diha sa Sitio Dawis, Barangay San Roque.

Gawas sa kapolisan ug mga barangay tanod adunay boluntaryo nga nitabang nga mga residente tungod kay buot nila nga maprotektahan ang ilang lugar batok sa virus.

Sa bag-ong gipagawas nga resulta sa pag-testing adunay usa gikan sa Barangay Inayawan ang nagpositibo.

Sa nasayran niabot sa 118 ka sakyanan ang gipabalik sa ilang agi gumikan kay wala kini makapakita og saktong dokumento nga sila makasulod sa Siyudad sa Talisay. /BDB (BANATNEWS)