Recruitment scam gipabantayan

CEBU, Philippines — Niluwat og warning ang Pilipinas Shell batok sa mga dautang tawo nga niggamit sa ngalan sa kompanya sa pag-ilad og mga aplikante.

Matud pa nga ang mga aplikante pangayoan og placement fee ug papaliton og personal protective equipment (PPE).

Ang mga taho nga naabot sa Shell nagbutyag nga ang mga mangingilad nagpaaron-ingnon nga HR personnel sa kompanya og nagbutang og mga pekeng pahibawo sa internet.

Sumala pa nga ang aplikante papadad-on og resume sa [email protected], usa ka peke nga email address, ug dili kini opisyal nga email account sa Shell o bisan unsang paris nga kapunongan.

Human mopadala sa resume, ang mga aplikante ingnon dayon nga mo-advance og kantidad alang sa giingong cash bond ug presyo sa PPE.

Matud pa nga iuli ang maong kantidad kung madawat na ang aplikante sa trabaho.

Kung napadala na ang kwarta, dili na makontak sa aplikante ang maong scammer.

Sa usa ka pamahayag, nagkanayon ang Shell nga kining maong mga tawo o grupo walay koneksyon sa kompanya.

Ang pag-rekrut og mga aplikante sa Shell giagi lang sa mga opisyal nga mga channel ug walay kantidad nga pangayuon.

Nitambag ang Shell sa mga gusto mo-apply og trabaho nga moagi sa mga opisyal nga channel para mosusi kung tinuod ang mga trabaho nga gipang-post.  (BANATNEWS)