Utility firms sa Mandaue gihangyo nga molugway sa bayranan

CEBU, Philippines — Gihangyo karon  sa konseho  sa Dakbayan  sa Mandaue ang mga utility firm nga hatagan og lugway ang mga molupyo sa siyudad sa ilang pagbayad  sa binulan nilang obligasyon.

Si Konsehal Nerissa Ruiz sa iyang giduso nga resolusyon nagkanayon nga ang mga molupyo nakasinati karon og kalisod sa ilang kahimtang sa pagpuyo tungod sa nagpadayon nga paghulga sa coronavirus disease (covid-19).

Nunot sa maong hulga maoy gihimong lakang sa lokal nga kagamhanan ang pagpatuman sa enhanced community quarantine (ECQ) nga niresulta usab sa temporaryong paghunong sa panarbaho sa mga molupyo sa siyudad.

Gitataw sa resolusyon ni Ruiz nga mahimong idata-data ang pagbayad sa mga molupyo sa dakbayan ang kantidad sa ilang binulan nga obligasyon.

Ang resolusyon nga giduso ni Ruiz ang giaprobahan usab sa mga sakop  sa konseho ug ang kopya sa maong resolusyon ilang ipadala ngadto sa mga utility firm  nga nagserbisyon sa dakbayan alang sa pagsanong ug pagtagad sa gipadangat nilang hangyo. /BDB (BANATNEWS)