CEBU, Philippines — Dakpon na ang mga tawo nga dili magsul-ob og face mask nga mogawas sa ilang panimalay sa bisan asa nga dapit sa Siyudad sa Talisay.
Kini human si Mayor Gerald Anthony “Samsam” Gullas Jr. niluwat og executive order niadtong Martes human iyang nakita nga adunay mga tawo nga kompiyansa lang sa ilang kaugalingon taliwala sa krisis sa coronavirus.
Lakip sa kamanduan sa mayor ang pagdakop sa mga tawo nga walay Quarantine Pass nga magsuroy-suroy.
Ang mga establisemento ang gimanduan sa dili pagpasulod sa mga tawo nga walay QP ingon man face mask. Tuyo niini nga mogamay ang mga tawo mga maglaroy-laroy ug mapatuman na ang social distancing batok sa COVID-19.
Subli nga gihangyo ni Gullas ang tanan nga pabilin lang gyud sa pinuy-anan ug mag-ampo nga malabang ra kining pagsuway.
Susama sab ang gipatuman sa Dakbayan sa Bogo human si Mayor Carlo Martinez niluwat og EO sa pagpasul-ob og face mask o ubang protective equipment sa pangpubliko nga lugar.
Ang market administrator maoy responsable sa pagseguro sab nga gituman sa mga manindahay ug sa moadto sa merkado nga mosunod sa kamanduan sa mayor. Siya sab ang gitahasan nga mo-monitor kung gituman ba ang kamanduan sa tanang government o public buildings ug uban pang public open spaces sa dakbayan. Le Phyllis F. Antojado/GMR (BANATNEWS)