Nagtigbakay ug nangaligo sa dagat sikop sa kapolisan

CEBU, Philippines — Nikabat ngadto sa 56 ka tawo nga nalambigit sa tigbakay ang nadakpan atol sa gipahigayong operasyon sa Cebu City Police Office (CCPO).

Kini ang gibutyag ni Police Colonel Josefino Ligan, direktor sa Cebu City Police Office (CCPO diin ang maong mga nadakpan atol kini sa ilang gipahigayong operasyon  niadtong Biyernes Santo hangtud sa Easter Sunday.

Si Ligan niawhag sa publiko nga tumanon ang kamandoan sa gobiyerno nga dili lang una mo gawas-gawas samtang gipaubos pa ang tanan sa enhanced community quarantine.

Gawas sa tigbakay adunay nadakpan nga naatlan nga naghantak panahon sa kagabhion diha sa mga suok nga dapit sa Siyudad sa Sugbo.

Samtang sa Dakbayan sa Talisay unom ka tawo kinsa nagtigbakay ang nasikop niadtong Domingo sa hapon diha sa Barangay Tabunok.

Ang mga dinakpan mao sila si Argiel Torregosa, 37, taga Sitio Tiago, San Isidro, Talisay City; Philip Galan, 30, taga Tisa, Labangon, Siyudad sa Sugbo; Arnulfo Nuñez, 50, taga Lower Malibu, Mandaue City; Joel Tanudra, 47,  taga Punta Labangon, Siyudad sa Sugbo; Felson Ting, 38 ug Ricky Samanigo parehong taga Barangay Basak Mambaling, Siyudad sa Sugbo.

Nasakmit sa kapolisan ang duha ka manok igtatari nga adunay buwang, usa ka manok nga patay ug P700 nga pusta.

Sa laing bahin, nasikop  ang 15  ka tawo  nga nakalapas sa  gipatuman nga enhance community quarantine (ECQ) diin naaktohan sila nga nangaligo  sa dagat  niadtong Easter Sunday sa hapon.

Si  Police Colonel Clarito Baja,  hepe  sa kapolisan  sa Presinto 3  sa Lapu-Lapu City  Police Office (LLCPO)  nagkanayon nga ang maong mga dinakpan makabayad og multa nga P1,000  ang matag usa kanila.

Samtang si Nagiel Bañacia, pangulo  sa  City Disaster Risk Reduction and Management Office (CDRRMO) nagkanayon nga kadtong walay kwarta nga ikabayad  sa multa ilang  palimpiyohon sa hospital isip silot nga ipahamtang kanila.  Gabriel C. Bonjoc, Romeo T.  Limpang/BDB (BANATNEWS)