30 ka pamilya gipapuyo sa gym sa San Nicolas; Palma nangulo sa worldwide praying

CEBU, Philippines — Niabot ngadto sa 30 ka pamilya ang gipahimutang diha sa ilang gym ni Kapitan Clifford Jude Niñal sa Barangay San Nicolas Proper, Dakbayan sa Sugbo.

Matud ni Niñal nga ang maong mga pamilya anaa kini nagpuyo sa mga sidewalk sa ilang barangay hinungdan nga iyaha kining gipahiluna sa gym apan hugot gihapon niyang gipatuman ang social distancing.

Gibutyag ni Niñal nga usa sa iyang nakitang problema karon mao ang pagtubag sa sugo sa lawas sa mga anaa sa gym tungod kay usa lang kabuok ang pansayan nila ug malaumon sila nga mabutangan kini og dugang ayuda sa kagamhanan.

Gibutyag usab ni Niñal nga nagkinahanglan siya og mga banig, habol, balde, sabon, pagkaon, gatas, tambal ug senina alang sa mga kabataan ug sa pipila ka mga dagko nga pipila lang kabuok ang sinina.

Sa laing bahin, si Archbishop Jose Palma sa Archdiocese of Cebu nangulo sa Worldwide Praying for Healing niadtong Miyerkules sa gabii diha sa Cebu Metropolitan Cathedral.

Ang pag-ampo gipahinungod ni Palma sa mga nabiktima sa covid-19, mga pamilya niini, frontliners ug sa tanang katawhan nga nagtinabangay niining panahona.

Ang maong worldwide praying for healing makita kini pinaagi sa social media tibuok kalibutan.

Mahinumduman niadtong Marso 19, 2020 si Pope Francis nanawagan ug worldwide healing rosary isip pakigbatok sa pandemic nga gisugdan niadtong Marso 25, 2020 ni Cardinal Luis Antonio Tagle, Prefect for the Congregation of the Evangelization of Peoples diin ang healing rosary didto sa Roma ug gisundan ni Palma. /BDB (BANATNEWS)