Palma: Ang tanan adunay kasulbaran

CEBU, Philippines — Si Archbishop Jose Palma sa Archdiocese of Cebu nipadayag nga bisan sa mga kahadlok, kabalaka nga giatubang karon sa tibuok kalibutan tungod sa covid-19 pandemic aduna gihapon kini kasulbaran ang tanan.

Matud ni Palma nga karong panahona ang gihuna-huna sa mga tawo dili lang ang iyang kaugalingon lakip na usab ang iyang isig ka tawo ug pinaagi sa pakighiusa adunay solusyon ang tanan.

Si Palma nagkanayon nga wala pa masayri kanos-a matapos ang maong sakit nga nikuyanap apan kinahanglan gihapon nga mosalig “in God’s time” ug tinabangay sa tanan adunay kahumanan ang tanan.

“We heal as one with kindness, usa kita sa pag-amping ug pag-ampo, mo serbisyo, mopaambit ug mopakita sa kalumo ilabi na ngadto sa mas labing nanginahanglan”, ni Palma pa.

Gidasig ni Palma ang mga magtutuo samtang wala pay mga misa nga tambongan sa mga tawo diha sa parokya nga mosunod lang sila sa mga misa ug religious program sa DyRF1215 nga maoy modala sa mga kalihokan sa Archdiocese of Cebu.

Dugang ni Palma nga niining giatubang karon nga problema sa covid-19  siya maampuon uban sa iyang kasingkasing ug hunahuna nga wala lang nag-inusara apan usa ka pamilya, usa ka nasud nga “we heal as one”. /BDB (BANATNEWS)