Purok System ipatuman sa CCPO

CEBU, Philippines — Ipatuman sa Cebu City Police Office (CCPO) ang purok system sa pagpatuman sa Enhance Community Quarantine sugod karong adlawa subay sa mando ni Cebu City Mayor Edgardo Labella nunot niining pagkatap sa coronavirus (COVID19).

Matud ni CCPO Director Police Colonel Hector Grijaldo nga makigalayon sila sa mga barangay aron limitahan na gyud ang mga kalihokan sa mga tawo.

“Ang mangyayari bukas (Sabado) that we will lockdown all the city borders pasabot ana ihunog nato ang pagsulod sa mga sakyanan. Ang mga tawo nga naa na sa sulod sa inner layer (Cebu City) nga dili taga dinhi ato silang “i –wipeout” meaning pagawson ang dili mga taga Cebu City ug dili na sab pagawson sa border ang mga residente sa syudad,” pasabot pa ni Grijaldo.

Dugang pa ni Grijaldo nga kinahanglang  magdala og Identifications Cards o quarantine pass nga gikan sa kagamhanan sa siyudad ang mogawas sa balay.

Ang ubang makasulod ug gawas gitawag og Authorized Persons Outside Residence kun (APOR) sama sa sakop sa military, kapolisan, medical personnel, LGUs, media ug uban pa nga accredited sa kagamhanan sa siyudad.

Si Police Regional Office director Police Brigadier General Albert Ferro nanawagan sa publiko nga di angay mabalaka ug magpabiling kalma ug mokooperar lang sa panawagan sa gobiyerno.

“Please cooperate with the government. I want you to know that our government is doing everything so there’s no need to panic. So cooperate and help us,” matud ni Ferro. /IBM (BANATNEWS)