CEBU, Philippines — Uyon si Talisay City Mayor Gerald Anthony “Samsam” Gullas Jr. sa panawagan sa ubang mayor nga unta ikonsiderar ang sakop sa pamilya nga makaangkas sa motorsiklo.
Kini human ang Department of Transportation (DOTr) nipabalik sa maong kamanduan alang sa mas istrikto nga “no back rider policy” aron kalikayan ang pagtakod sa sakit ilabi na sa makalilisang nga coronavirus.
Nagkanayon si Gullas nga nalipay siya nga ang Office of the Presidential Assistant for the Visayas (OPAV) ug ang Land Transportation Office (LTO) nikonsiderar sa pagpatuman sa kamanduan.
“Pasabot pwede man unta basta pamilya lang. Para nako, maayo ra to na compromise na gibuhat ni Sec. Dino para kanato. Pero wala man gipadayon sa DOTr,” matud ni Gullas.
Matud niya nga nakasabot siya sa hangyo sa katawhan ilabi na ang matang sa transportasyon mao ang motorsiklo.
Sigun pa sa mayor nga niapil siya sa hangyo sa ubang mga mayor tungod kay lisud man alang sa katawhan.
Mohangyo siya sa iyang mga kanhi kauban sa Kongreso aron sila matabangan sa ilang hangyo ilabi na ngadto sa iyang apohan nga si Kongresista Eduardo Gullas sa unang distrito sa Lalawigan sa Sugbo.
Dakpon gyud
Samtang ipatuman gyud ang istrikto nga pagpangdakop sa Cebu City Police Office kalabot sa "no back rider policy" sa Dakbayan sa Sugbo.
Kini maoy gibutyag ni CCPO Director Police Colonel Hector Grijaldo human nga nipagawas og kamanduan ang DOTr sa pagdili nga magpaangkas subay sa implementasyon sa social distancing.
Dugang pa ni Grijaldo nga sugdan na sab nila kini og pangpangdakop ang mga motorsiklo nga adunay angkas sukwahi sa unang konsiderasyon nga gitugutan lang nila nga makaangkas ang sakop sa pamilya nga kauban sa balay.
Gani gisugdan na og dakop sa gipahigayon nga checkpoint diin niresulta kini sa upat ka drayber ang gidakop human nga wala nipatuo sa social distancing.
Subay niini padayon karon ang monitoring ug pagpangdakop sa mga motorsiklo nga wala mopatuman sa “no back rider policy.” Sheriza Mae R. Uy/GMR (BANATNEWS)