Idlas nga pusher, magsuon sikop
CEBU, Philippines — Wala kaugpo ang idlas nga durugista nga nadakpan sa Drug Enforcement Unit sa Pardo Police Station ala 1:30 kagahapon sa kaadlawon sa may B. Aranas Extension, Duljo Fatima, Dakbayan sa Sugbo.
Ang dinakpan mao si Alfred Javier Ingalis, 48, anaa sa drug watchlist isip high-value individual nga nagpuyo sa maong dapit. Matud ni Police Major John Kareen Escober, hepe sa Pardo Police Station 7, nga usa ka semana nilang gipangita si Ingalis kinsa kanunay lang mogawas ang pangan sa ilang mga nadakpan nga mga durugista.
Nakadawat sab sila og reklamo gikan sa mga residente sa barangay ug giingong sige lang og balhin-balhin ang suspek og tagoanan.
Nakuha gikan kang Ingalis ang 110 gramos sa gidudahang shabu nga mobalor og P748,000.
Gisusi karon sa kapolisan ang tinubdan sa ilegal nga drugas ni Ingalis.
Kasamtangang gitanggong sa Pardo Police Station si Ingalis samtang gipaabot ang pagsang-at sa kasong kalapasan sa Republic Act 9165 o Dangerous Drugs Act of 2002. Samtang magsuong trisikad driver ug ang laing babaye ang nasikop sa kapolisan sa Dakbayan sa Talisay atol sa buy-bust operation sa Barangay Tabunok kagahapon sa alas 3 sa kaadlawon.
Ang subject sa operasyon mao si Carlo Sellon Abellana, 24, nagpuyo sa maong lugar samtang naapil sa pagkasikop ang kauban niini nga si Topher Sellon Abellana, 19, ug Charina Retuya Baraclan, 19, taga Poblacion Ward 4, Minglanilla. Nakuha gikan sa mga dinakpan ang 16 ka gagmay nga pakete sa shabu nga nitimbang og 0.80 gramos nga adunay balor nga P5,440. Ang mga dinakpan gibalhug sa bilanggoan ug gikatakdang pasakaan og kaso. Sheriza Mae R. Uy, Gabriel C. Bonjoc/GMR (BANATNEWS)
- Latest
