Paglangan sa pagbayad sa bills gisugyot

CEBU, Philippines — Pakigtagboan ni Cebu City Mayor Edgardo Labella ang Cebu Chamber of Commerce and Industry, bankers association, utilities ug telecommunication companies aron pagtuki kun mahimo nga lugwayan ang pagbayad sa bills o kaha pag-post una niini. Kini nunot sa hangyo sa katawhan gumikan kay daghan ang apektado sa hulga sa Coronavirus Disease 2019.

“Kung makahangyo ta nga i-condone usa ka buwan ba or unsaon nato nga mitigated nga dili lang una siguro kolektahon until after mahunong ning atong giatubang nga krisis, sa Visayan Electric, MCWD ug other utilities ug telcos ug ang ma banko,” matud ni Labella.

Sigun sab sa mayor nga duna sila’y gipalit nga mga bugas isip ayuda niadtong mga “no work, no pay” nga mga trabahante ingon man sa mga drayber nga nawad-an og panginabuhi ilabi na nga gipatuman ang social distancing aron malikayan gyud ang pagkatap sa virus.

Samtang si Konsehal Raymond Garcia nipahibawo nga nagplano sila nga moduso og ordinansahon nga maghatag og diskwento sa mga business establishments sa ilang business tax sa buwan sa Marso ug Abril.

“Kaning mga landlords bitaw sa mga restaurants sa mga establishments that’s precisely the reason why we’re thinking of giving a discount so they could also give a discount to their tenant, in other words they are paying it forward so among gihangyo ang mga landlords nga hatagi lang sab og leeway ang inyong mga tenants nga you know you give them a discount o di ba ninyo pabayron sa abangan for a certain a number of months just to help out,” matud ni Garcia.

Tukion sab sa tigum karong adlawa kun mahimo nga sayuhon paghatag ang 13th month pay sa mga empleyado. /GMR (BANATNEWS)