Duha ka balay sa Lahug, naugdaw

CEBU, Philippines — Dul-an sa P45 mil ang danyos sa sunog nga niulbo sa may Nivel Hills, Barangay Lahug ning Dakbayan sa Sugbo kagahapon sa hapon.Giisa sa second alarm ang sunog ug hingpit nga napawong alas 4:33 na  sa hapon.  Ang sunog giingong nagsugod sa panimalay ni Raul Villanueva apan wala pa matino kun unsay sinugdanan niini.

Matud pa Cebu City  Fire Arson Investigation Unit FO2 Emerson Arceo duha ka balay ang naugdaw ug duha ang nakan-an sa kalayo. Gisusi pa karon kung pila ka mga pamilya ang apektado sa maong sunog. Kagahapon sa buntag, ang mga sakop sa Bureau of Fire Protection sa Cebu City nisuroy sa Barangay Hipodromo ug nipahimangno sa katawhan bahin paglikay sa sunog.  Nanghatag sab sila og mga flyers aron mabasa  sa mga tawo kun unsay buhaton kun dunay motumaw nga sunog. Ang bulan sa Marso giproklamar nga Fire Prevention Month tungod kay aning bulana sagad dunay daghang sunog nga mahitabo. /IBM (BANATNEWS)