CEBU, Philippines — Plantasyon sa marijuana sa Brgy. Kaluangan sa Asturias gironda sa kapolisan ug gilarot ang P9 milyones nga balor sa marijuana sa mga sakop sa Regional Mobile Force Battalion (RMFB7), 703rd Maneuver Company.
Gipangulohan ang maong operasyon ni Police Captain Emmanuel Rabaya ug Police Lieutenant Rafael Lorenz Serion platoon leader sa Oplan Birada.
Matud ni Rabaya tulo ka semana nilang gipanid-an ang lugar human dunay nitug-an kanila nga adunay lapad nga plantasyon sa marijuana sa maong dapit.
Nalarot ang 20 mil ka fully-grown marijuana, ug mga marijuana seedlings sa dapit. Apan nakadagan ang nagtamom sa marijuana kinsa nailhan gihapon sa kapolisan kinsa pasakaan gihapon nila og kasong kalapasan sa Republic Act 9165 kun Dangerous Drugs Act 2002.
Tungod sa gidaghanon gidauban nalang kini ug nagdala nalang og pipila ka punoan isip ebidensya.
Sa pikas bahin, 21-anyos nga si Ryan Carl Abas ang nadakpan sa buybust operation sa mga sakop sa Drug Enforcement Unit sa Mambaling Police Station pinangulohan ni Police Captain Francis Renz Talosig sa Sitio Buli, Barangay Duljo- Fatima sa Dakbayan sa Sugbo.
Si Abas giingong High Value Individual Regional Lecel nga nag puyo ra usab sa maong dapit. Atol sa buybust operation nakuhaan kini og 805 gramos nga gidudahang shabu nga mobalor kapin sa P5.4 milyones.
Ang dinakpan ana gibalhog sa Mambaling Police Station pasakaan og kasong kalapasan sa Art ll Sec.5 og Sec. 11 RA 9165. Romeo Marantal/IBM (BANATNEWS)