CEBU, Philippines — Upat ka lalaki nga giingong gun runner ang nasikop sa gipahigayong entrapment operation sa Criminal Investigation and Detection Group (CIDG)-7 niadtong Biyernes sa hapon diha sa Barangay Calamba, Dakbayan sa Sugbo.
Gipangulohan ang maong operasyon ni Police Lieutenant Colonel Niño Lope Briones, hepe sa CIDG Metro Cebu Field Unit.
Ang mga suspetsado mao sila si Elton Segarra, 34-anyos, taga Barangay Umapad Dakbayan sa Ma0ndaue, Virlie Montejo, hingkod ang taga Barangay Calumboy, Lungsod sa Sogod, Ramel Rajos, 36, taga Barangay Pajo Dakbayan sa Lapu-Lapu ug Norman Leyson 27, taga Barangay Pagsabungan, Dakbayan sa Mandaue.
Matud ni Briones nga ang maong operasyon subay kini sa ilang paghingusog sa kampaniya batok loose firearms.
Gibutyag ni Briones nga nakadawat sila og impormasyon kabahin sa ilegal nga pagpamligya og armas sa mga suspetsado.
Ang kapolisan nipahigayon og pagpaniid sulod sa usa ka semana batok sa mga suspetsado ug giplano usab nila ang entrapment operation aron masikop ang maong mga gun runner.
Gibutyag ni Briones nga nilabor ngadto sa P7 mil ang kantidad sa kalibre .45 nga pistola nga gibaligya kanila sa mga suspetsado.
Human nga nagpositibo ang maong unang transaksiyon gisundan dayon kini nila og palit og laing tulo ka kalibre .38 nga revolver nga gibaligya sa mga suspetsado og P3 mil matag usa niini.
Si Briones nagkanayon nga ang mga armas nga ilang nasakmit gikan sa mga suspetsado pulos kini mga paltik nga giingong gibuhat gikan sa Dakbayan sa Danao.
Ang mga suspetsado gikatakdang pasakaan og kasong kalapasan sa Akta Republika 10591 kun “Comprehensive Firearms and Ammunition and Regulation Act”. /BDB (BANATNEWS)