Maestro patay human nibangga ang motor sa railings

CEBU, Philippines — Patay ang usa ka 32-anyos nga maestro sa pampublikong eskwelahan sa Dakbayan sa Sugbo human kini nadisgrasya diha sa national road sa Barangay Balud, Lungsod sa Dalaguete niadtong Huwebes sa hapon.

Ang nakalas mao si Marc Ocampo Ladaran, taga dalan B. Rodriguez, Dakbayan sa Sugbo.

Matud  ni Police Staff Sergeant Christopher Romarate, desk officer sa Dalaguete Police Station nga nagmaneho si Ladaran sa iyang motor gikan sa Dumaguete City padulong sa Siyudad sa Sugbo ug pag-abot diha sa kurbadahong bahin sa lugar wala makontrolar niini ang gimaneho niyang motorsiklo.

Ang motorsiklo ni Ladaran nilahos ug nibangga sa railings hinungdan nga nalagpot kini diha sa karsada.

Si Ladaran kinsa nakaangkon og grabeng kadaot sa lawas ang daling gidala diha sa Alcantara Memorial Hospital sa Barangay Poblacion sa Dalaguete apan gideklarar kini nga nga patay na nga naabot sa maong tambalanan.

Mga mananagat nga nanagat sa sanctuary gidakop

Sheriza Mae Uy

CEBU, Philippines — Duha ka mananagat  kinsa giingong nakahimo og kalapasan sa pagpanagat ang nasikop sa gipahigayon nga joint operation sa Criminal Investigation and Detection Group (CIDG)-7  Lapu-Lapu City Field Unit ug Lapu Lapu City Police Office (LLCPO) diha sa Barangay Talima, Isla sa Olango, Dakbayan sa Lapu-Lapu.

Ang operasyon gipangulohan ni Police Major Lirio Coral, hepe sa CIDG-7 LLC Field Unit ug Police Captain Genesis Aneversario, hepe sa LLCPO Police Station. Ang mga suspetsado mao sila si Cristian Gonzaga alyas “Ian”, 32-anyos ug Crisanto Barong, 74, pulos lumad nga taga Dakbayan sa Lapu-Lapu.

Ang kapolisan ni-served sa warrant of arrest nga giisyu ni Regional Trial Court (RTC) Judge Angelo Arizala sa Branch 52 sa Puerto Princesa, Palawan.

Ang duha gidakop tungod sa kalapasan sa Section 97 sa Akta Republika 8550 kun “An Act Providing for the development, Management and Conservation of the Fisheries and Aquatic Resources, Integrating  All Laws Pertinent Thereto, and for other purposes”.

Ang Section 97 mao ang “Ban on Muro-ami, Other Methods and Gear Destructive to Coral Reefs and Other Marine Habitat”.

Giingong ang mga suspetsado nanagat kini diha sulod sa sanctuary sa Puerto Princesa.  /BDB (BANATNEWS)