CEBU, Philippines — Duha ka Chinese nationals nga gipasanginlang kidnappers ang nadakpan sa joint operation sa Police Regional Office 7 ug Anti-Kidnapping Group 7, samtang tulo ka managsuong Chinese nationals nila nga biktima ang naluwas sa kapolisan diha sa Barangay Mactan sa Dakbayan sa Lapu-Lapu.
Ang mga dinakpan mao sila A Gui ug Xiao Fan, pulos taga mainland China ug nag-abang sa usa ka apartment sa Dakbayan sa Lapu-Lapu kun diin usab nila gitago ang mga biktima.
Ang mga biktima giila nga sila Xu Qin, 29 anyos, Xiang Qin, 30 anyos ug si Sun Guo Dong, 21 anyos nga pulos taga Xiyan Town, Shanglin County, Nanning City, Guangxi Region sa China.
Ang tulo gidudahang trabahante aning Philippine Overseas Gaming Operation (POGO).
Matud ni LCPO Director Police Colonel Clarito Baja nitawag kanila ang Chinese Consulate ug nipahibalong ang mga kabanay sa managsuon nagpatabang bahin sa giingong pagdagit. Ang LCPO nakigalayon dayon sa AKG-7 hinungdan sa gihimong operasyon.
Pasado alas- 2 sa kaadlawon natultolan ang apartment kun diin gitago ang tulo.
Nangayo’g ransom
Matud ni AKG 7 Regional Chief Police Colonel Dexter Rellora ang mga kabanay sa biktima mitug-an nga gipangayo-an sila og ransom money nga RMB 120,000 kun P879 mil matag usa (P1.2 milyon).
Giingong gi-chat sa mga kidnappers ang mga kabanay sa tulo ug gipangayoan sila og ransom kun gusto pa nilang mabuhi ang tulo. Gitagalan sila nga mapadala ang kwarta sa tungang gabi sa Marso 4.
Atol sa operasyon, naabtan nalang nila ang tulo ka biktima nga anaa sa sulod sa usa ka lawak nga naghapa sa higdaanan, nakaposas ug adunay mga bun-og sa lawas. Ang duha ka suspek nga nadakpan maoy nagbantay sa tulo.
Sa pakighinabi sa kapolisan sa mga biktima sila mibutyag nga nanarabaho sila sa Dakbayan sa Lapu-Lapu apan wala sila masayod kun unsa nga kompanya ang ilang gitrabahoan.
Si PRO7 Regional Director Police Brigadier General Albert Ferro nagkanayon nga gikonsiderar nila kini nga isolated case kay una pa kining higayon nga dunay
kidnapping sa Central Visayas sukad pa kaniadtong nadestino pa siya sa AKG ug karon anaa na sab siya sa Central Visayas.
Giangkon niyang makaalarma kini apan masaligon siya nga walay luna sa Central Visayas ang mga kidnapers.
Background Check
Nunot niining pagdagsa sa mga Chinese nationals dinhi sa Visayas, gisugyot ni Office of the Presidential Assistance for the Visayas (OPAV) Sec. Michael Dino nga kinahanglang estriktohon ang background checking sa mga Chinese nationals nga mosulod sa nasud.
Kinahanglang susihon sa Department of Labor and Employment kun kining mga biktima ug mga suspek konektado o empleyado ba sa POGO.
Karong adlawa pormal nga ipasaka ang kasong kidnapping batok sa duha ka suspetsado ug depende na sa korte kung ipa-deport sila. –/IBM (BANAT NEWS)