CEBU, Philippines — Mga tag-as nga opisyales sa Philippine National Police nangaangol human ang ilang gisakyang PNP chopper nasangit sa kable sa kuryente sa dayon nilang biya gikan sa bakanteng luna diha sa San Pedro, Laguna kagahapon sa buntag.
Gidala sa tambalanan sila si PNP Chief Director General Archie Gamboa; PNP spokesperson Police Brigadier General Bernard Banac; Directorate for Intelligence Director Police Major General Mariel Magaway ug Directorate for Comptrollership Director Police Major General Jose Maria Victor Ramos nga giingong kritikal ang kahimtang samtang, naangol sab ang duha ka piloto ug aide de camp ni Gamboa.
Silang tanan daling gidala ngadto sa usa ka pribadong tambalanan sa kaulohan.
Si Police Regional Office 7 director Police Brigadier General Albert Ferro nagpasalamat nga luwas na ang kahimtang ni Gamboa ug mga kaubanan.
Base sa pasiunang impormasyong nadawat ni Ferro “zero visibility” tungod sa abog mugna sa propeller sa chopper ang hinungdan mao nga wala mabantayi ang kable sa kuryente diin sila nasangit ug nahagsa.
Daling giugkat sa mga sakop sa Highway Patrol Group ug Bureau of Fire Protection ang tanang sakay sa chopper ug gidala sa tambalanan.
Pasado alas-8 si Gamboa uban sa unom ka opisyal nga aduna gitambongan nga inspeksyon sa bag-ong impounding area sa Highway Patrol Group sa Laguna.
Ang helicopter nga gisakyan nila Gamboa usa kini sa tulo ka bag-o nga helicopter nga gipalit sa gobiyerno. –/IBM (BANAT NEWS)