CEBU, Philippines — Giangkon sa kadagkoan sa Cebu City Jail nga dako gyud ang problema sa illegal drugs sa sulod sa ilang prisohan human nga daghang mga kontrabandong nasakpan human sa gipahigayong joint-greyhound operation sa Police Regional Office 7 ug CCJ.
"Ang mga illegal drugs na nakuha dito, only shows na may problema talaga kami," matud la ni CCJ Warden Jail Superintendent Julius Arro.
Tungod sa kadaghan sa nakuhang mga klase-klaseng kontrabando buot ni Arro nga imbestigahon ang tanang jailguards. Tungod kay nagduda siyang dili kini makasulod kun walay nakigkunsabo.
Kun dunay panagkunsabo niining pagpasulod sa mga kontrabando labaw ng makasulod ang illegal nga drugas. Gitinugha ni Arro nga makaangkon og high-tech equipment ang CCJ aron malikayan nga makasulod pa ang kontrabando ngadto sa mga bilanggo.
Tinubdan sa druga?
Si PRO7 Regional Director Police Brigadier General Albert Ferro nga gibuhat ang paglusad sa greyhound aron pagsusi sab sa mga pasangil sa mga dinakpan sa operasyon batok illegal nga drugas nga ang tinubdan nila sa drugas naa nagbase sa maong prisohan.
Si Ferro miingon nga andam sila pagtabang sa Bureau of Jail Management and Penology (BJMP) pagsubay kun kinsa ang mga nalambigit niini.
Dugang pa ni Ferro nga sa pagkasamit sa dili mo minus 20 kilos nga shabu sa Central Visayas nagpamatuod lang nga dako gyud gihapon ang problema sa illegal nga drugas. Sa operasyon kagahapong adlawa, 56 ka pakete sa gidudahang shabu, 193 drug paraphernalia, 17 syringes, P140,941.75 nga cash ug 141 ka mobile phones ang nasakmit.
Apil sab sa nasakmit ang mga tangke sa LPG, mga canned beers, mga kaka, chargers, mga mahait nga hinagiban ug daghan pang uban nga gidili makasulod sa prisohan. Ang mga cellphones nga nakuha isumiter sa Regional Anti-Cyber Crime Laboratory alang sa pagpaubos niini sa forensic examinations sa posibilidad nga aduna pay impormasyon nga makuha. /IBM (BANATNEWS)