CEBU, Philippines — Nalipay si Mayor Gerald Anthony “Samsam” Gullas Jr. sa Syudad sa Talisay kay dali nga nakakuha og atensyon ang iyang post sa Facebook may labot sa Talisaynong bata nga adunay bukol sa iyang nawong.
Si Gullas nibisita gyud sa pinuy-anan sa bata didto sa Barangay Tanke human nabasa niini ang mensahe sa ginikanan nga nangayo og tabang.
Ang bata giila nga si Arvy Niño dunay stage 4 nga retino blastoma nga naka apektar sa retina sa mata sa bata.
Si Gullas uban ni Felipa Solana, pangu sa City Social Welfare and Development (CSWD) nitunol sa pasiuna nga hinabang ngadto sa bata pinaagi sa iyang ginikanan nga si Rodrigo ug Dyesebel.
Ang maong bata adunay dako nga bukol sa iyang mata nga halos nitabon na sa iyang nawong.
Nagpasalamat siya ni Senador Bong Go, Secretary Michael Dino ug sa iyang apohan Kongresista Eduardo Gullas nga nipasalig nga motabang sa operasyon sa bata.
Apan nihangyo gihapon si Gullas sa mga tawo nga adunay malumo nga kasing-kasing nga kung mahimo matagaan og pinansyal nga hinabang ang pamilya kay aduna pamay daghang gastohan niini samtang nagpaalim sa samad. /IBM (BANATNEWS)