51 paresan gikasal sa Dumos Teofilo

CEBU, Philippines — Gibugkos sa kaminyoon ang 51 ka paresan subay sa usa ka semana nga kalihukan sa ika-106 nga birth anniversary ni anhing Archbishop Teofilo Camomot karong Marso 6, nga gitawag og Handuraw 2020. Si Archbishop Jose Palma mismo ang nipahigayon sa kasal alas 10 kagahapon sa buntag sa Dumos Teofilo sa Valladolid, Dakbayan sa Carcar.

Gitambongan ang kalihukan sa pamilya sa mga gikasal lakip sa kamadrehan nga sakop sa Daughters of Santa Teresa, ang congregation nga gitukod ni Camomot dul-an sa 60 ka tuig na ang nakalabay.

Matud ni Palma nga malipayon siya sa panagtigum sa kasal tungod kay nagpakita kini og timaan sa dakung gugma sa Dios nga gipadayag sa kasal.

Mapasalamaton sab si Palma sa kamadrehan nga maoy naningkamot aron matigayon ang mass wedding.

Matud ni Rev. Mother Maria Louella Grace Buscato, DST Mother Superior, nga ang mass wedding maoy ikaupat na ka tuig. Ang mga kinasal gikan sa Dakbayan sa Carcar ug mga silingan nga kabarangayan.

Kadaghanan sa mga gipangkasal nagpuyo-puyo gikan sa lima  ngadto sa 10 na ka tuig kinsa uban niini gitabangan og kuha sa ilang mga rekisitos sama sa certificates of no marriage ug birth certificates.

Libre usab ang salo-salo sa mga kinasal sa reception lakip ang bitbiton nga wedding gift sa mga kinasal.

Atol sa mass wedding, gipahalipayan usab ni Palma si Buscato kinsa nagsaulog sa iyang ika-53 ka tuig sa adlaw nga natawhan. /GMR (BANATNEWS)