CEBU, Philippines — Kusganon ng ipatuman sa Police Regional Office 7 ang kampanya batok sa tanang matang sa illegal nga sugal sa tibuok Central Visayas.
Lakip na niini ang pagsugal atol sa haya sa patay nga maoy naandan sa mga tawo. Subay kini sa kamandoan ni Philippine National Police Chief Police Director General Archie Gamboa nga paghingusog sa pagdakop sa tanang matang sa illegal nga sugal sa nasud.
Matud pa ni PRO7 Police Brigadier General Albert Ferro nga kung adunay hepe nga dili makatuman sa mando parelibohan dayon sa iyang katungdanan. Kini ilabi na kun makitang duna gihapoy mga illegal numbers game sama sa illegal swertres sa ilang hurisdiksyon.
Sumala pang Ferro nga lakip sa gidili kining mga sugal sa mga haya sa patay.
Sa bag-o palang milingkod sa katungdanan si Ferro mibahad na kining daan sa mga sakop nga iyang tangtangon sa katungdanan ang mga City ug Provincial Directors kung dili makasugpo sa flagship campaign sa kapolisan sama sa illegal nga drugas ug illegal nga sugal. /IBM (BANATNEWS)