CEBU, Philippines — Padayon gihapon nga nagbiyahian ang mga traysikol ug traysikad sa national highway sa Dakbayan sa Talisay.
Kini bisan pa man sa kamanduan sa Department of Interior and Local Government sa pag-ban sa mga traysikol, traysikad ug motorized pedicabs sa nasudnong karsada.
Si Jonathan Tumulak, traffic czar sa siyudad, niangkon nga wala pa gyud nila kini napatuman tungod kay padayon ang ilang pakigdiyalogo ug konsultasyon sa kagamhanan.
Matud niya nga iyang gipakigtagbuan ang mga organisasyon sa mga traysikol niadto pang Enero aron ilang makab-ot ang maayo nga buhaton aron dili kaayo bug-at sa maapektohan.
Asoy pa ni Tumulak nga aduna gyud mga drayber nga nagdumili niini apan gipasabot gyud kini nila.
Sunod semana magtigum sila uban sa taga DILG ug Department of Social Welfare and Development.
Nagkanayon si Tumulak nga lakip sa ilang hisgutan ang rota nga malikay na sila sa pag-agi sa national highway samtang ila sab kini nga iduso sa konseho aron mahimong legal ang ilang rota nga sundon. GMR (BANATNEWS)