Larsian giinspeksiyon tungod sa sanitary issue

CEBU, Philippines – Ang City Health Office (CHO) nakigtambayayong kini sa Probinsiya sa Sugbo sa pagpahigayon og inspeksiyon diha sa Larsian nga nahimutang sa Fuente Osmeña, Dakbayan sa Sugbo.

Kini subay sa giingong balik-balik nga sanitary issue sa maong food strip.

Si Cebu City Mayor Edgardo Labella nimando kini sa pagpahigayon og imbestigasyon human sa viral video diha sa social media nga nagpakita sa mga ilaga nga giingong nilatay sa display nga karne sa usa ka food stall sa Larsian.

Si Dr. Daisy Villa, hepe sa CHO nibutyag nga nagpahigayon sila og inspeksiyon sa Larsian human nga nag-viral ang nahisgutang video. Matud ni Villa nga gimandoan niya ang environmental officer sa CHO nga si Dr. Bernice Espina nga susihon dayon ang lugar.

Matud ni Villa nga kong masuta nga ang mga vendor sa Larsian walay health card o expired na ang health card posibleng suspensohon o i-revoke sa CHO ang giisyu nila nga sanitary permit.

Pwede ato kuhaan sa ilang sanitary permit unless maka-comply then atong ibalik, padayag ni Villa.

Samtang si Espina nagkanayon nga sa sitwasyon sa Larsian makasulod ra ang mga peste o hayop ug ang operasyon niini 24/7 hinungdan nga maglisod og schedule og pest control. /BDB (BANAT NEWS)