Parking sa merkado sa Mandaue pabayran

CEBU, Philippines —  Gitinguha karon sa kagamhanan sa Dakbayan sa Mandaue nga mahimong pay parking sa mga sakyanan ang parking area sa merkado publiko.

Si Konsehal Jimmy Lumapas nga maoy chairman sa committee on market, transportation and communication utilities niingon nga kini ilang himoon tungod sa ilang namatikdan nga adunay mga overnight parking nga mga sakyanan.

Matud pa niya nga nireklamo ang mga delivery truck driver ug ingon man ang mga pumapalit nga adunay sakyanan kay maglisud sila sa pag-parking sa ilang mga sakyanan sayo sa buntag nga mao usab ang oras sa ilang pag-deliver ug pagpangompra tungod kay daghan na man ang nag-parking sa maong lugar.

Dugang pa ni Lumapas nga sa pakisusi nga ilang gihimo ilang nasuta nga pipila sa mga sakyanan nga nag-overnight parking sa maong lugar ang gipanag-iya sa mga nagpuyo usab duol sa maong dapit nga walay kaugalingong parkingan.

Gipasabot ni Lumapas nga ang traffic aide nga nadestino sa maong dapit moisyu og tiket nga nagkantidad og P20 isip parking pay sulod sa tulo ka oras nga gidugayon.

Dugang sa paglapas sa gitagal nga tulo ka oras maoy bayran sa tag-iya sa gi-parking nga sakyanan ang P10 nga bayad sa matag oras nga paglapas sa parking niini. Giklaro hinoon ni Lumapas nga dili paninglan og parking fee kadtong mga delivery truck nga adunay i-deliver sa sulod sa mekado ug ingon man kadtong mga kustomer nga mangompra sa sulod sa merkado. GMR (BANATNEWS)