CEBU, Philippines — Ang mga Sugbuanon mahimong maka-avail sa usa ka libre nga operasyon sa cataract ug pterygium sugod karong adlawas hangtod sa Pebrero 1.
Kining maong medical mission ubos sa maayong kabubut-on sa Rotary Club of Metro Cebu sa pakigsosyo sa PLDT Employees Credit Cooperative, Inc. (PECCI) pinaagi sa tsirman niini nga si Dennis Donao, ug sa Basilica Minore del Sto Niño de Cebu.
Ang medical mission himuon diha sa Basilica Minore del Sto. Niño ug abli na ang rehistrasyon karon sa Basilica Medical Clinic. Ang libre nga pag-opera sa katarata ug pteryhika usa ka proyekto sa Rotary Club sa Metro Cebu (RCMC) nga anaa na karon sa ika-42 nga tuig sa pagserbisyo sa komunidad human nga gisugdan kini kaniadtong Hunyo 3, 1978 sa Rotary International.
Sulod sa daghang katuigan, ang RCMC nagpahigayon og ubay-ubay nga mga medikal misyon ug paghatag og mga hinabang sa mga lugar nga naigo sa katalagman.
Ang club nagpahigayon og libre nga operasyon sa sobra sa 3,000 ka mga bata pinaagi sa Operation Restore Hope Medical Mission kauban ang mga doktor nga mga espesyalista gikan sa Australia ug Estados Unidos. Sa laing bahin, ang RCMC adunay tulo ka semana nga programa sa pagpakaon alang sa dul-an sa 100 sa labing kabus nga mga estudyante sa Don Carlos Gothong Memorial High School sa Siyudad sa Sugbo. LPM (BANATNEWS)