CEBU, Philippines – Nangayo og pasaylo sa publiko kadtong lalaki nga nisagol og laway sa pintura nga gipahid sa lawas sa laing tawo nga nakuhaan og video atol sa niaging Sinulog.
Giila ang maong lalaki nga si Jayson John Tapales human mismo ang kagamhanan sa Dakbayan sa Danao ang nipapangita kaniya.
"Sa akong napahiran, kinasingkasing nako sa kadtong duha na mapasaylo ko nila," matud ni Tapales.
Si Tapales niatubang sa buhatan ni Konsehal Joel Garganera sa Dakbayan sa Sugbo human ang duha ka biktima nga taga Talamban nidangop sa iyang buhatan kuyog sa ilang abogado.
"Gawas sa nihimo siya og public apology, andam sab siya na modawat og unsa man ang mga lakang sa mga agrabiyado na party, kadto duha kabuok na gipahiran and at the same time ang City Government sab," matud ni Garganera.
Si Konsehal Edmund Lao, chairman sa committee on complaints and investigation sa konseho sa Dakbayan sa Danao, nagkanayon nga sa pagkasayud nila sa hitabo nitabang sila sa pagpangita kang Tapales.
"The City of Danao dili mi mo-tolerate og ing-ani nga incident," matud ni Lao.
Gitun-an karon sa Cebu City Legal Office kung unsa nga kaso ang ipasaka batok kang Tapales.
Samtang plano nga irekomendar sa Cebu City Police Office sa konseho sa Dakbayan sa Sugbo nga ideklarar nga persona non grata si Tapales.
Matud ni CCPO Director, Police Colonel Engelbert Soriano, nga ang gibuhat ni Tapales usa ka pagbinatos sa kapistahan ni Señor Santo Niño bisan gihulagway nga lingaw-lingaw lang ang pag-spray ug pagbutang sa pintal apan ang gibuhat niini nagpakita nga wlay respeto. /GMR (BANAT NEWS)