5-anyos nga intsik dunay corona virus

CEBU, Philippines — Gikompirmar sa Department of Health 7 nga anaa sa Sugbo ang 5-anyos nga Chinese national nga adunay corona virus.

Matud ni DOH-7 Director, Dr. Jaime Bernadas, nga ang maong bata kuyog sa iyang inahan nga niabot sa Sugbo niadtong Enero 12 sa alas 2 sa kaadlawon ug alas 6 sa buntag na-admit sa tambalanan.

Plano sa ginikanan nga paeskwelahon og English sa Sugbo sulod sa usa ka tuig. Ang bata ug inahan nakalukat na og tiket balik sa China sa Enero 9.

Sumala pa ni Bernadas nga positibo sa corona virus ang bata apan iyang gitataw nga dili kini SARS o MERS-Cov virus.

Ang sample gipadala na kini ngadto sa Australia alang sa confirmation kung unsa kini nga klase sa corona virus sulod sa 24 ngadto sa 48-oras.

Sa pagkakaron wala pay ngalan ang maong klase sa virus ug ginganlan lang una kini og corona virus 2019.

Ang bata ug inahan anaa sa isolation sa usa sa mga pasilidad sa Sugbo nga wala gibutyag ni Bernadas.

Tanang local hospital ug rural health units sa Sugbo ang alerto na subay sa protocol nga gitakda sa DOH pagpangandam sa susamang hitabo kaniadto sa SARs ug MERS-Cov.

Dugang ni Bernadas nga ang inahan sa bata ug lain pang 12 ka tawo nga dunay kontak sa bata ang ilang gi-monitor karon apan sa pagkakaron wala pay sintomas nga nakita.

Anaa na usab ang bata sa maayo nga kondisyon apan dili pa kini tugtan nga makauli hangtud dili moabot ang resulta gikan sa Australia. /GMR (BANATNEWS)