Devotee City buksan na alang sa mga deboto

CEBU, Philippines – Buksan na alang sa mga deboto ni Senior Santo Niño ang Devotee City karon adlawa human sa blessing niini niadtong adlaw nga Huwebes.

Kini ang gibutyag ni Phillip Zafra, chairman sa peace and order sa konseho sa dakbayan ug chairman sa Devotee City nga nahinabi sa Banat News

Matud ni Zafra nga 80 ka container van ang mapuy-an sa mga deboto diha sa Devotee City.

Gibanabanang moabot ngadto sa 2,500 nga deboto ang makaukopar sa mga container van.

Ang mga deboto nga dawaton nga makapuyo sa Devotee City kadtong gikan sa mga probinsiya gawas na sa Dakbayan sa Carcar sa habagatan ug gawas na sa Dakbayan sa Danao sa amihanan nga bahin. Matud usab ni Zafra nga ipakita lang sa mga deboto nga walay kapuy-an dinhi sa siyudad ang ilang mga ticket sa bus o sa bangka aron sila makapuyo sa Devotee City.

Ang mga deboto aduna kini pasilidad nga magamit sama sa kaligoan, lutoan ug pansayan apan dili sila makahimo sa pagpanglaba.

Adunay ipatuman nga mga patakaran diha sa Devotee City sa dili angayan ug angayan nga buhaton.

Gibutyag ni Zafra nga adunay mga kalingawan nga ipahigayon diha sa Devotee City aron malingaw ang mga deboto nga namuyo.

Dugang ni Zafra nga computerized na ang devotee City diin tanang mga nipuyo niini ang kinahanglang kanunay nga magsul-ob sa ilang ID.

Ang mga deboto moparehistro kini diin ipaubos sila sa profiling ug hatagan og ID diin tumong niini ang seguridad nga mamuyo diha sa Devotee City.

Nunot niini, si Cebu City Mayor Edgardo Labella kuyog ang mga opisyal sa siyudad nitambong sa launching sa Devotee City.

Gibutyag ni Labella nga gawas sa mga bag-ong contingent pipila sa mga nangaging mga champion na nga contingent ang niapil na usab alang sa grand parade karong tuiga.

Dugang ni Labella nga ang presidente sa nasud motambong sa kalihukan.

“The President is coming, beyond my expectations nitubag atong pinalanggang presidente nga moanhi, motan-aw, mo-attend siya sa grand parade sa Sinulog, it’s going to be a security challenge sa ato. But the presence of the president will add more meaning, substance and significance to the occasion”, ni Labella pa. /BDB (BANAT NEWS)