Human sa dakop, kapolisan nagpakaon

CEBU, Philippines — Nagpakaon sa kabataan sa Barangay Tangke, Dakbayan sa Talisay ang kapolisan human sa ilang halapad nga dakop sa mga tawo nga nalambigit sa ginadiling drugas pinangulohan ni Police Major Gerard Ace Pelare.

Si Pelare nagkanayon nga mao kini ang iyang gipasabot nga kinahanglan nga balansehon ang kampanya labot sa ilegal nga drugas.

Ang ilang Police and Partners Act of Kindness (PACT) maoy programa nga mopaduol sa katawhan ilabi na ngadto sa kabataan.

Niabot sa 100 ka bata ang nabusog sa ilang gidalit nga pagkaon inubanan sa mga private sectors kagahapon sa buntag.  Matud ni Pelare nga ang kabataan maoy umaabot nga lider sa nasud maong angay sila nga tudloan daan sa maayo nga pamatasan ug dili pasagdan ilabi na sa ilang palibot nga naa ang mga tawo nga nagpahigayon og ilegal.

“In 10 years time, if left unattended, these children will be our problem in illegal drugs and crimes. As early as now, we are launching a protracted war against illegal drugs with the Police PACT,” sigun ni Pelare.

Ang Talisay Police nakadakop og moabot sa 46 ka tawo nga nalambigit sa ginadiling drugas kun diin niabot sa P5 milyones nga kantidad sa shabu ang ilang nasakmit.

Ang pamilyang Obrero nga nailang high value target (HVT) maoy nalakip sa ilang dakop niadtong Sabado sa kaadlawon.

Ang ilang pagkasikop maghatag og mensahe nga sila seryuso sa ilang kampanya ingon man pagpaminus sa supply sa ilegal nga drugas sa maong lugar. /GMR (BANATNEWS)