CEBU, Philippines — Gikatahong 85 ngadto sa 90 porsyento nang andam ang Sinulog Foundation Inc. alang sa nagsingabot nga Sinulog Grand Parade.
Kini ang gitug-an sa executive director sa SFI Jojo Labella nga nahinabi sa Banat News.
Matud ni Labella nga nagpadayon pa gihapon sila sa pagpangandam alang sa dakong kalihukan ug mabulokon nga Sinulog Grand Parade karong umaabot nga Enero 19.
Si Labella nagkanayon nga andam na usab sila sa production, security, reception ug billeting.
Gibutyag ni Labella nga pipila na lang ka mga butang ang ilang gikinahanglan nga buhaton alang sa umaabot nga Sinulog.
Ug aduna nay mga schedule alang sa pagpahigayon og blocking sa mga dancer diha sa sulod sa Cebu City Sports Center. Dugang ni labella nga adunay masaksihan nga nindot nga fireworks atol unya sa finale. /BDB (BANATNEWS)