‘No jaywalking’ ipatuman sa Talisay
CEBU, Philippines — Dakpon na unya ang mga tawo nga magpataka og labang sa karsada sa Dakbayan sa Talisay.
Matud ni Jonathan Tumulak, traffic czar sa siyudad, nga padayon nila nga gipalambo ang trapiko sa dakbayan aron maibanan ang suliran sa trapiko.
Hinungdan nga ang buhatan ni Tumulak nituon sa ordinansa nga napasar nga wala kaayo nahatagi og pagtagad.
Nakit-an ni Tumulak nga naa sa ordinansa ang “no jaywalking” o ang paglabang sa dili pedestrian lane.
Siya nagkanayon nga daghan sa katawhan ang nabutang sa peligro tungod sa pagpataka og labang ingon man nakatampo kini sa paghinay sa trapiko.
Hinoon si Tumulak niingon nga posible nga ilang mapatuman ang lagda karong buwana o sa sunod nga buwan kay ila tun-an ang ordinansa kun unsa ang silot sa makalapas. Nakig-alayon na sab siya sa konseho ug kang Mayor Gerald Anthony “Samsam” Gullas Jr. aron ipatumanan ang istrikto nga lagda.
Gawas niana, nipasalig sab si Tumulak nga ila sab nga pahibaw-on ang publiko sa dili pa nila ipatuman ang lagda. /GMR (BANATNEWS)
- Latest
