CEBU, Philippines — Nagpabiling blangko ang kapolisan pag-ila sa duha ka wala hiilhing mga lalaki nga mipusil patay sa kanhi blocktime broadcaster nga karon usa na ka blogger ug realtor niadtong Disyembre 30 sa gabii diha sa Quimod Compound sa Sitio Calabasa sa Barangay Danglag sa lungsod sa Consolacion.
Ang biktima giila nga si Edmund Arcilla Garces, 41, nagpuyo sa nahitaboan nga giingong kanhi blocktimer sa RPN-DyKC nga sibyaanan ug nalambigit sab sa negosyo sa real state ug blogger usab sa social media.
Si Police Chief Master Sergeant Brent Pulmaran sa Consolacion Police Station nga nakahinabi sa Banat News miingon nga daling nakasibat ang mga mamumuno human sa pagpamusil.
Matud pa ni Pulmaran nga usa sa ilang gisubay ang personal nga bangi ang hinungdan sa pagpatay kang Garces.
Base sa paagi sa pagpusil sa biktima dunay dakong kasuko ang mga mamumuno tungod kay 14 ka higayon kining gipusil, gani bisan nahagba na kini sa yuta gitiwasan pa kini.
Si Pulmaran miingon nga dali nga gidala ang biktima sa iyang mga kabanay ngadto sa Eversely Child Sanitarium General Hospital sa Barangay Jagobiao sa Dakbayan sa Mandaue apan si Dr. Monica Tagasawa nga maoy attending physician sa maong tambalanan ang mideklarar sa biktima nga dead on arrival. Gitataw ni Pulmaran nga ilaha sab subayon ang uban pang anggulo sa maong krimen. /IBM (BANATNEWS)