CEBU, Philippines — Wala hatagi og pagtugot sa City Legal Office sa Dakbayan sa Sugbo ang hangyo sa mga drag racing enthusiasts nga makapahigayon sila og drag racing event diha sa South Road Properties.
Duha ka mga organisasyon ang nagpadala og susamang proposal letter ni Cebu City Mayor Edgardo Labella nga naghangyo alang sa sponsorship ug pagtugot sa pagpahigayon sa usa ka motorcycle drag race sa Il Corso, SRP sa Enero 12, 2020.
"Drag racing is violative of standing laws and regulations, particularly RA 4136 otherwise known as "The Transportation and Traffic Code" as well as BP 33 and DOJ Advisory Opinion #1 series of 2012 - being considered an act inimical to public interest and perils and endangers lives and properties, ”matud pa ni Atty. Rey Gealon.
Si Engineer Mark Yap, sa Phat Boys Production (PBP) nipadala og suwat kang Labella pinetsahan og Disyembre 10 alang sa maong hangyo.
“Cebu City through the effort of Councilor Raymond Garcia will raise the bar of drag racing to professional heights to give birth to new champions in eight categories of exhilarating and heart thumping racing, ” tipik sa maong suwat.
Gawas sa pagpangayo og pagtugot, nihangyo sab ang grupo og pinansiyal nga suporta nga mokantidad og P420,000 aron gamiton pag-andam sa race track.
Samtang sila si Justin De Los Reyes, Anacleto Flores III, Renante Cubil, sa Insik Inside nagpadala sab og susamang suwat ngadto kang Labella pagka- Disyembre 11 nga naghangyo alang sa pag-apruba sa maong drag racing.
"Our goal and mission is to organize this kind of event to prevent our fellow riders to do illegal street racing that could be very dangerous to our fellow motorist and pedestrian. Also to educate our fellow riders for safety and awareness,” ang sulat nagkanayon.
Nagtuo ang grupo nga makatabang sab ang drag racing sa turismo sa siyudad. Plano nilang himuon ang maong event karong Enero 12, 2020.
Apan gipasabot ni Gealon nga bisan tugotan ang drag racing dili mahimong ang siyudad mopagawas og pundo para niini tungod kay mahimo unya kining sundon sa gusto sab mohimo og samang kalihokan. /IBM (BANATNEWS)