CEBU, Philippines — Gipaubos pagbalik og anti-illegal drugs seminar sa pangu sa kapulisan sa lungsod sa Minglanilla ang tanang mga nangadakpang tiggamitan ug mga tigpayuhot og ginadiling drugas sa lungsod.
Ang maong seminar gihimo niadtong miaging adlaw pinangunahan ni Police Major William Homoc nipatapok sa tanang dinakpan sa kaso sa ginadiling drugas nga nipaubos sa plea bargaining agreement.
Didto, iyang gimaymayan ang tanan nga unta ilang taposon ang programa sa Community Based Treatment (CBT) kay mao kini ang motabang sa pag giya kanila nga dili na mahitumpawak pagbalik sa way ayo nga binuhatan.
Matud pa ni Homoc nga kun motipas nasab sa hiwi nga dalan ang 143 ka tawo nga nipaubos sa plea bargaining agreement maglisod na gyud kini sa paggawas sa bilangguan. Siya nagkanayon nga swerte nalang gani sila kay gitagaan gihapon kini og higayon sa gobyerno nga ipamatuod sa kaugalingon nga mahimo gihapon sila nga magbag-o.
“Kinahanglan inyo gyud usbon inyong pagkatawo kay wala kamoy moral ascendancy kong simbako ang inyong mga anak mag-adik adik. Unsaon pa man nimo pagbadlong kung ikaw amahan o inahan utro pang adik-adik? Di ba walay moral ascendancy?” matud pa sa hepe.
Nipakapin sab sa paghatag og tambag si Homoc nga ang pagsalig sa Labaw’ng Makagagahom mao sab ang dakong papel sa kinabuhi nga ikaw magiyahan. /IBM (BANATNEWS)