Stakeholders magtukod og dam— Archbishop Palma

CEBU, Philippines — Ang pagpatukod og dam nga mapundohan og tubig panahon sa ting-uwan aron adunay magamit panahon sa huwaw ang nasabutan atol sa gipahigayong tigom tali kang Archbishop Jose Palma ug sa mga stakeholder.

Sa nilabay’ng semana si Palma nipatawag kini og tigom diha sa Archbishop Palace tali sa mga ahensiya sa kagamhanan diin gituki nila ang kabahin sa ka kuwang sa supply sa tubig.

Atol sa maong tigom nauyonan ang longterm solusyon nga mao ang paghimo og dam.

Sayo pa, si Konsehal Dave Tumulak niduso og resolusyon nga maghangyo sa simbahan nga ang Metropolitan Cebu Water District makalungag sa ubang simbahan aron makuhaan og tinubdan sa tubig ug tungod niini si Palma nipatawag sa nahisgutang tigom.

Gawas sa long term solution gihisgutan usab sa maong tigom ang short term solution.

Matud ni Palma nga ang maong plano buhatan pa og feasibility study sulod sa usa ka tuig ug isumiter pa kini ngadto sa gobiyerno. /BDB (BANATNEWS)