Opisyal sa PRO-7 moretiro na sa katungdanan

CEBU, Philippines —  Ang hepe sa Police Regional Community Affairs and Development Division Police Colonel Renato Dugan ang moretiro na sa iyang katungdanan.

Si Dugan nagpanuigon kini og 54-anyos ug sulod sa 28 ka tuig na kini sa iyang serbisyo sa Philippine National Police (PNP).

Sa iyang retirement honor ceremony nga gipahigayon kagahapon sa buntag diha sa Police Regional Office (PRO)-7 nipadayag kini sa iyang personal motto nga “life is like a sunrise” diin positibo siya og panan-aw sa kinabuhi.

“I felt satisfied na, kunbaga I am done with my job, I have done with my duties as a member of the PNP, walay pagmahay”, matud ni Dugan.

Si Dugan kinsa nahimong Regional Training Officer sulod sa 14 ka tuig nagkanayon nga dako usab niya nga kalamposan ang pag-mold sa bag-ong mga recruit nga polis.

Matud ni Dugan nga ang pag-mold sa kapolisan mao ang pinakakritikal nga proseso sa career sa usa ka polis tungod kay ang resulta sa training sa usa ka polis o bag-ong recruit mao usab kini ang makita sa ilang performance kon sila ibutang na sa gawas o komunidad.

“Ang ako lang ikasulti, as a police officer, we will just do our job properly, kong maghimo ta sa atong trabaho dili for compliance but we will do our job giving our best ug giving our ginatawag nato nga commitment”,ni Dugan pa.

Epektibo karong Disyembre 31, 2019 ang pagretiro ni Dugan sa posisyon.

Si Dugan niawhag sa publiko nga padayong mosalig sa kapolisan ug sa mga programa niini sa komunidad.  BDB (BANATNEWS)