CEBU, Philippines – Ang Probinsiya sa Sugbo dili na mohatag og financial assistance ngadto sa mga non-government organizations ug civil society groups bisan kong magpa-accredit kini sa Probinsiya sa Sugbo.
Si Gobernador Gwendolyn Garcia nagkanayon nga adunay pipila ka NGOs ug CSOs nga nagpa-accredit lang tungod kay mangayo og kwarta sa Kapitolyo.
“Duna gani nagpa-accredit nga manpower services, negosyo pero COOP man, nagpa-accredit pero ang capitalization P10 million pero mangayo og kwarta kuno sa province kay mao man na ang naandan”, matud ni Garcia.
Si Garcia nipadayag sa iyang kabalaka nga posibleng maabuso kini kong walay accountability.
Gihulagway ni Garcia nga susama sa Priority Development Assistance Fund (PDAF) nga gideklarar sa Korte Suprema nga unconstitutional.
“Naa ba nay accountability? Wala baya nay COA”, ni Garcia pa.
Si Garcia nagkanayon nga adunay ubang NGOs o CSOs nga girekomendar sa ubang ahensiya apan dihang gi-download na ang kwarta alang sa proyekto walay resulta nga napakita.
Sa laing bahin, nipadayag sa ilang kahangop ang mga kawani sa kagamhanan sa Dakbayan sa Lapu-Lapu nga makadawat na usab sila og cash incentive isip monetary award.
Ang maong cash incentive ihatag kanila sa pagsaulog sa pasko niining tuiga.
Lakip sa mga kawani nga makadawat sa maong cash incentive mao ang opisyales sa siyudad, mga regular, casual kawani ug kadtong mga nagtrabaho nga niabot na og upat ka buwan.
Ang maong cash incentive gibase kini sa gikauyonan nga Ordinance No. 15-0397-2019.
Natigayon ang maong paghatag og cash incentive sa maong mga kawani human ang siyudad nakadawat kini sa Seal of Good Governance (SGLG) 2019 gikan sa Department of Interior and Local Government (DILG). /BDB (BANAT NEWS)